السبت , 23 فبراير 2019 - 2:07 مساءً
رئيس مجلس الإدارة د/ أحمد عبد الصبور
رئيس التحرير التنفيذي محمد يحيى

المعارضة المفلسة

بقلم الدكتورة / غادة حمادة
فارسني قوي بعض من معارضين التعديل الدستوري للمادة 140… لانهم قلبوا بعد ماتطاولوا علي مؤيدين السيسي والمؤيدين للتعديل بانهم عبيد ومطبلاتية واغبيا… بداوا يعملوا دلوقتي زي جارتنا ام حسنين اللتاتة بلستة من الكلام الممجوج والمحفوظ والماسخ اللي بقالهم بيرددوه لمده خمس سنيين من غير مايزهقوا

كلامهم الماسخ عن انتخاب مؤيدين السيسي له مع انه قال مش هيرشح نفسه وبعدين اعلن ترشحه بالبدلة العسكرية… السيسي اللي ضحك علينا وقال ماعنديش برنامج وخمنا بكلمة واحدة بس اللي هي انتم نور عنينا… وبيعتبروا اننا انتخبناه مرتين في انتخابات صورية مع كومبارسات… مع ان والنعمة حمدين كان جايب 5 مليون صوت في 2012… واعادنا انتخاب السيسي عادي تاني بعد ماباع الارض… الجزيرتين يعني…

وبيرددوا كلام سئمناه بصراحة عن جهاز االكفتة وفلوس المؤتمر الاقتصادي والتفريعة ومشاريع الفنكوش التي لا تعطي عائد مادي ولا معنوي… وموافقين علي قمع المرشحين وسجنهم وسجن وقتل واعتقال الابرياء بتهم كارتونية… وبلا بلا بلا

اييييييه… انتم مابتزهقوش من الكلام السخيف ده… قولوا كلام واقعي بقي شوية بعد التغييرات اللي حصلت علي ارض الواقع والحقايق اللي اتكشفت بدل الكلام القديم الكوميدي ده… افصلوا بقي دي الغسالة بتفصل

واللي مش قادرة افهمه للمرة المليون بصراحة لحد دلوقتي هم ليه محموقين قوي كده علي الدستور اللي سموه دستور الانقلاب وغير شرعي وبتاع الرقاصات وعمرو موسي… واللي هم ولا شاركوا في التصويت عليه ولا في انتخاب السيسي من اصله ولا وافقوا علي 30 يونيو

انت بتتريقوا علي مؤيدين السيسي اللي مش عاجبينكم… طب هزيدكم من الشعر بيت

انتم في بلد حضراتكم فيها الشعب الديمقراطي الجميل اللي نزل انتخب مجلس الاخوانجية والسلفنجية بس عشان هم مؤهلاتهم الوحيدة انهم “ناس بتوع ربنا” في 2012… مع ان بردو الناس بتاعة ربنا دي بذات نفسهم قالوا مش هيترشحوا ولايسعون للسلطة

انتم في بلد حضراتكم اللي طلع فيها 13 مليون انتخبوا بن العياط مع ان بردو الاخوان قالوا مش هينزلوا بمرشح رئاسي… ومع ان المرشح الاساسي كان خيرت الشاطر… بس راحوا كده انتخبوا الاستبن عادي

انتم في بلد حضراتكم الناخب فيها ممكن يعصر لمون ويضيع بلد بزيها وينتخب مرشح مش عاجبه رفضا للآخر… او ناخب بيتشري ب ٥٠ جنيه وبأختيار رمز المرشح اللي مايعرفش اسمه من الاصل عشان مابيعرفش يفك الخط… او ينتخب بردو عادي عشان المرشح ده “بتاع ربنا” واداه ازازة زيت وسكر وبطاطس وكأننا بننتخب امام جامع ولا رئيس جمعية مش رئيس دولة

انتم في بلد حضراتكم طلع فيها 13 مليون انتخبوا ابن العياط الي قدم مشروع النهضة بالاسم فقط وماقالش يبقي ايه المشروع ده ولا عامل ازاي وبعد مانجح طلع قال ده طائر بريش وجناحات ومؤخرة… وده علي لسان مرسي نفسه ومش بتبلي عليه

انتم في بلد حضراتكم لسة فيها ناس بتحلم وتقول ان مرسي راجع القصر بعد صلاة العصر او بعد ضرب الاسطول الامريكي لمصر وعادي… عشان مرسي قال مش مشكلة نقتل شوية ناس عشان الباقي يعيش

انتم في بلد حضراتكم فيها ناس لسة بتعتبر مرسي الرئيس الشرعي… مع انه عبيط وعهد الله… وكان بيقول الكهربا بتقطع بسبب عاشور اللي بياخد ٢٠ جنيه… والقرد لو مات القرداتي هيشتغل ايه… والمفروض نوت درايفينج وانت درانك… والزيت والبنزين دونت ميكس… والناس اللي هم عددهم ٧٦٥٤٣ واقفين في الحارة المزنوقة… والصباع اتنين تلاته دول الي بيلعبوا هيقطعهم

انتم في بلد حضراتكم فيها ناس معترضة علي تعديل الدستور واعادة انتخاب السيسي مع انها ايدت سابقا البيان الدستوري بتاع مرسي اللي قال فيه انا ربكم الاعلي

انتم في بلد حضراتكم فيها ناس شايفين التعديلات الدستورية في تركيا حلاوة بالقشطة وقعاد اردوغان كل المدة دي مش ديكتاتورية خالص ومش هتجيب تركيا ورا ولا حاجة… وان انقلاب تميم علي ابوه هي الديمقراطية بعينها

انتم في بلد حضراتكم فيها ناس مع نية ترشح عنان اللي فوق السبعين سنة للانتخابات واعلن الاخوان واصحاب شعار يسقط حكم العسكر تايدهم له وهو للمفاجاة يعني عنان كان ولازال رجل عسكري ورئيس اركان حرب الجيش كمان مش خريج ادآب…

انتم في بلد حضراتكم فيها ناس كان عاجبها نية ترشح شفيق اللي هو بردو رجل عسكري والناس شالت وزارته ايام الثورة وشتموه وقالوا عليه حرامي وخمورجي وبيقطع في الكلام وسموه ابو بلوفر…

انتم في بلد كان فيها ناس عاجبها نية ترشح خالد علي ابوصباع ومني البرنس والمكوجي والبقال… هل هي دي الديمقراطية اللي انتم عايزينها… ديمقراطية الكيد والنكاية وخلاص

احنا مش عايزين نعترف ليه اننا لازلنا في مراحل بعيده جدا عن ديمقراطية بلاد بره والاحزاب القوية اللي بتقدم مرشح قوي ببرنامج قوي للحزب كله… ويهمها مصلحة البلد والحفاظ علي وحدته وكيانه ومؤسساته

ولا انتم كان عاجبكم انتخابات الميغة في 2012 اللي ال 13 مرشح فيها كان كلهم اضرب من بعض… ناس كل مؤهلاتها انها استوفت ال ٢٥ الف توكيل… او تاييد نواب برلمان مع انهم ارهابيين… او مرشحين عن احزاب لانعرفها… او سياسيين سابقين ملطوطين عفي عليهم الزمن… والناس نزلت بحادي بادي تنتخب… ونجح من استطاع خداع الاغلبية

انا لا اتمني ان نمر بمثل هذا تاني… واعتقد ناس كتير عندها نفس وجهة النظر دي… واتمني والله ان المعارضة تشتغل بجد وتقدم مرشح يملي الدماغ… ويكون قوي ومحترم ووطني… واقعد انا اللي بأيد السيسي اقارن وافكر واختار… مش عايزة مرشحين ضاربهم السلك وكل انجازاتهم انهم بيطلعوا يشتموا ويتهجموا وبس…

انا شخصيا لا اتمني ان مصر تمر بتجربة زي دي تاني… وتبقي في مهب الريح… ونعيش تاني مرحلة فراغ انتخابي وشخصيات واقعة وزي الزفت وكل واحد وشطارته بقي في الكلام ونلبس في معتوه جديد… ايه… فوقوا بقي… هو انتم عايزين الرئاسة تبقي زي البطيخة المقفولة ياتطلع حمرا ياتطلع قرعة…

انا متأسفة يامعارضة… انا اوؤيد تغيير المادة 140 واعادة انتخاب السيسي… لحد المعارضة ماتب
ما تبقي بجد وتبقي رجاله بشنبات
بس كده !

حفظ الله مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *